Litratong Pinoy: Puti at Itim

Kung sawa ka na sa cake o cupcake bilang regalo sa isang okasyon, nasubukan mo na ba ang donuts na hugis paletra? Isang kakaiba at masarap na pahiwatig ng kahit anong mensahe.

Ito ay pinagawa ko sa Cello's Doughnuts and Dips sa may Taft Avenue (katapat ng La Salle). Lasang tinapay ang doughnuts nila, subalit matamis ang mga flavor sa ibabaw.

Litratong Pinoy: Tanso

Mahiwagang Lampara?

Sana nga ang mga ito ay mahiwagang lampara, subalit hindi yata.
Ang mga ito ay nakita ko sa pagkain ko sa Taj sa may Tagaytay.
Ang sarap ng pagkaing Indian, maanghang at malinamnam. Lubos na umaapaw sa ibat-ibang lasa.

Maganda ang dekorayson ng lugar. Kakaiba at kaaya-aya sa paningin. Sa isang taong malawak ang imahinasyon, mararamdamang mong ikaw ay nasa ibang lugar. Ang sarap kumain habang ang mata ay nabubusog sa magagandang paligid.

Litratong Pinoy: Mithi (Wish)

. . . gusto kong maglaan ng isang buong araw sa Tagaytay.

. . . gusto kong matapos na ang kasalukuyang semester at makapagpahinga mula sa mga takdang-aralin.

. . . gusto kong maglaan ng isang buong araw na nagbabasa ng mga kakabili ko lang na libro.

. . . gusto kong bumlaik sa Ilocos.

. . . gusto kong makita ang autumn (taglagas) sa pagpunta ko sa ibnag bansa ngayong Oktubre.

. . . gusto ko ng Sony Pink Vaio.

Marami pala akong gusto! hahaha! :)

Litratong Pinoy: Dalampasigan

Kakagaling ko lang nang Pagudpud noong Lunes. Inabot kami ng bagyong Igme kaya maulan at malakas ang alon. Subali't sadyang ang ganda pa rin sa bayan na ito. Halos dulo na nga ng Luzon.

Ang aking maruming paa sa magandang dalampasigan ng Blue Lagoon, Pagudpud, Ilocos Norte. Suot ko ang aking Havaianas na munting nang tangayin ng agos.

Maraming mga bato at kabibe sa dalampasigan ng Blue Lagoon. Malinis at kulay asul at berde ang tubig nito.

Litratong Pinoy: Luntian

(Dapat sana kuha ng La Salle ang aking lahok sa linggong ito. Di nga lang ako nakapasok sa klase noong nakaraang Sabado kaya di ako nakakuha ng larawan. Sayang).

Ito na lang ang aking lahok. Isa ito sa mga paborito kong larawan. Kuha ito sa Calirana Resort kung saan kami namalagi ng ilang araw noong Mayo ng aking mga kaibigan. Ang bata sa larawan ay anak ng tagapag-alaga ng nasabing resort.




Noong nakaraang Sabado lang ay nasa Caliraya uli ako. Ang lawa ng Caliraya ay matatagpuan sa bayan ng Lumban sa Laguna. Ngayon naman ay sa Caliraya Recreation Center kami namalagi. Maganda ang lugar na iyon at maraming outdoor activities na pwedeng gawin. Ilalahad ko na lang sa mga susunod na araw. Ito naman ang mga kuha ko sa lugar na iyon.

Litratong Pinoy: Tatak Pinoy

Nakakaaliwalas uminom ng sariwang buko, lalo na ung manamis-namis.
Ang kare-kare ay masarap kainin kasabay ng ginisang bagoong.
Leche Flan, bilang panghimagas, gusto mo? Kapag ako ang kumakain ng leche flan, nilalagyan ko ng maraming arnibal.
Sa UP naman may sikat na isaw. Alam mo ba na sa Tagaytay - malalaki ang kanilang isaw at kulay pula dahil sa ketchup?
Sa Tagaytay, masarap ang mainit na sabaw ng bulalo. Kilala ang bayan ng Batangas sa putaheng ito.
Masarap akong magluto ng menudo. Gusto ko sa luto ko ay maraming atay.
Sa mga pulutan naman ay di mawawala ang sisig.
Kapag maulan, masarap ang mainit na sabaw. Lalong masarap kung ito ay maasim katulad ng sinigang na bangus sa miso.
Ang halo-halo ay sikat na panghimagas. Ito yata ang bersyon natin ng shaved ice. Paborito kong lahok ang saging at langka.
Sa pagluluto ng kaldereta, ang ginagamit ko ay atay ng manok. Gusto ko ang maanghang na kaldereta.
Sa may Laguna ko kinain ang sinigang na tuna belly sa larawan. Malinamnam!
Ang pinakapaborito kong almusal ay tapsilog. Gusto ko ang malasadong luto ng itlog. Sa Pancake House ko kinain ang tapsilog sa larawan.
Nilagang okra at bagoong isda- pinakasimpleng paraan ng pagluluto, pero sobrang sarap!
Banana que (matamis na saging na may asukal) - ito ay parte ng miryendang Pinoy!
At ang kahit anong prito ay pinapasarap ng sawsawan na toyo na mayroong asim ng kalamansi at anghang ng sili.

Pitumpung libo at isang-daa't pitong lasa at linamnam.

Tatak Pinoy!

Litratong Pinoy: Pag-aaral

Naalala ko na ito ang mga paborito kong gamiting pangmarka noong ako ay nasa kolehiyo pa.
Ano ang iyong paboritong kulay?

Ito naman ang paborito kong pansulat (hanggang ngayon).
Bensia kung ito ay tawagin. Sa tingin ko ay ito ang tatak ng lapis na ito.
Isa lang ang gusto kong kulay ng aking bensia - purple.

Kagabi ay nag-aaral ang aking kapatid. Ang linggo na ito ay linggo ng kanilang pagsusulit.
Sa Calculus siya pinakanahihirapan.
Saang subject kayo pinakanahirapan?

***

Mahirap rin pala mag-aral kasabay ng pagtratrabaho. Mahirap, subalit alam mo naman na para ito sa iyong personal na pagunlad.
Mapapadali kaya nito ang aking pag-aaral ngayon?

ang imahe ay mula sa pink--laptop.blogspot.com

Ito ang aking pinapangarap. Siguro sa buwan ng Setyembre na ko bibili. Tamang-tama sa subject ko na Statistics. Haaay, katakot!


Maligayang Huwebes!

Litratong Pinoy: Kalayaan

Si Ninoy . . . araw-araw ko siyang natatanaw sa aking pagpasok sa opisina.

Ang mga kalye ng Paseo de Roxas at Ayala ay naging saksi sa malayang pagpapahayag ng mga naghahangad ng pagbabago.

Tunay na nga ba tayong malaya?

Litratong Pinoy: Pag-iisang Dibdib

Marami ang nagsasabing ang kasal ay parang kaning isinusubo . . .

. . . pwede kang mapaso

. . . kapag hilaw ang kanin, hindi mo pwedeng isipin na maluluto ito sa iyong bibig

Katulad ng kasal, dapat sigurado ka kung kailan mo ito isusubo at gagawin

Subalit, hindi ba’t masayang makakita ng mga magsing-irog na masayang nagplaplano ng kanilang kasal?

Kayanin kaya akong buhatin ng aking magiging asawa katulad na lamang ng nasa larawan?


Maligayang unang Huwebes sa buwan ng Hunyo!

Litratong Pinoy: Ihip ng Hangin

Ito ay kuha ko gamit ang aking lumang kamera bago pa man siya tuluyan ng bumigay, masira at di ko na magamit upang kumuha ng larawan. Nakakalungkot dahil marami rin kaming napagsamahan -tulad na lamang nitong isang paglalakbay sa Subic na ginawa naming magkakaibigan sa opisina.

Bawat taon ay binibigyan kami ng kaukulang salapi ng aming kumpanya upang gumawa ng kahit ano na para sa amin ay masaya. Naalala ko noong isang taon may mga grupong umakyat ng Mt. Pinatubo, mayroon naming umakyat ng Taal, may iba na sumisid sa dagat, naligo sa dagat, nag-wake-boarding, nag-rafting sa Cagayan de Oro, mayroon din na kumain ng buffet sa Spiral at iba pa. Ang naisipan naming gawin ng aking mga kaibigan ay dumayo sa Subic at makiisa sa kalikasan – binisita namig ang Zoobic Safari Zoo, Ocean Adventure at ang huli nga – kami ay nagparasailing.

ang aking mga kaibigan sa kanilang paglipad

Ako ay nakaakyat ng mataas at habang ito ay hila ng isang mabilis na bangka – naramdaman ko ang hangin na umiihip sa aking buong katawan. Kasabay nito ay ang pakiramdam ng kapayapaan. Ito ang pinakamataas na narating ko kung saan pakiramdam ko ay malapit ako sa langit. Habang pinagmamasdan ko ang malawak na karagatan – napagtanto kong malawak at maganda pala ang mundo. Tahimik at payapa. Nawala ang aking takot. Ang humigit kumulang na apatanapung minuto na iyon ay ilan sa mga masasayang minuto ng aking buhay. Hindi ko ito malilimutan at sana ay maulit ko uli.



Ito ang aking unang lahok sa Litratong Pinoy.